Slawe?

Lukas 17:9 'n Slaaf wat sy opdrag uitgevoer het, word mos nie bedank nie, of hoe?

Dis weer daardie tyd van die jaar… oueraande.  As jou kind goed doen, is dit nie iets waarvan jy sal weet nie, maar as jou kind se punte nie na wense is nie… wel dan gaan sien jy maar die onderwyser.  Vir baie jare moes ek elke oueraand soos ‘n stout kind voor die Wiskundeklas sit en my beurt afwag om die onderwyser(es) te sien.

My kind is een van daardie rare spesies met wie jy nooit hoef te sukkel om sy huiswerk te doen nie.  Inteendeel, as hy ‘n taak kry om te doen, moet dit dadelik afgehandel word.  Hy dryf my soms teen die mure uit omdat hy alles reeds gister gedoen wil hê.  Voor eksamens werk hy ‘n hersieningsprogram uit en hy studeer sonder dat ek hom ooit hoef aan te moedig. 

Wiskunde is egter sy Moses, want Wiskunde is nie iets wat jy kan leer nie.  Of jy verstaan dit, of jy verstaan dit nie.  Volgens sy punte verstaan hy dit duidelik nie.  Moet sê ek het ook my bedenkinge oor mense wat ‘n antwoord kry as hul x en y bymekaartel J.  Op ‘n stadium het hy soveel ekstra klasse in Wiskunde gekry dat hy eendag gemompel het:  “Ek sal al getroud wees, dan moet ek nog ekstra Wiskunde klasse kry.” 

Genadiglik bestaan daar iets soos Wiskunde Geletterdheid – die ‘dom’ kinders se weergawe van Wiskunde, word daar blykbaar gespot.  In Graad 10, betree ‘n wonderwerk my kind se lewe in die vorm van ‘n Wiskunde onderwyseres wat die vermoë het om my kind uiteindelik Wiskunde te laat verstaan.  Hy kon nie ophou praat oor haar nie:  “Mamma moet sien hoe Juffrou vandag vir ons verduidelik het hoe…”  Wat meer is, sy wys hulle dat sy in hulle glo en maak drome in hul wakker wat hul lankal begrawe het.  Sy punte skiet op tot bykans 90%!

So breek oueraand weer aan.  Hy dring daarop aan dat ek sy Wiskunde juffrou gaan sien.  “Hoekom?” wil ek weet.  “Jou punte is mos nou uitstekend.”  “Om dankie te sê!” kom sy antwoord.  So sit ek weereens voor die Wiskundeklas my beurt en afwag.  Toe ek binnestap, begin die onderwyseres dadelik verduidelik hoe sy punte verbeter het.  Ek val haar so beleefd as moontlik in die rede.  “Juffrou, ek is nie hier om te kla nie, ek is hier in opdrag van my seun… om te kom dankie sê.”  Ek kan sien hoe die wind uit haar seile geneem is.  Ons het ‘n lang gesprek en groet mekaar met wedersydse waardering.

Daardie eenvoudige opdrag van my seun, was heel waarskynlik die nodige hupstootjie wat ‘n toegewyde onderwyseres nodig gehad het.  Vir haar is skoolgee nie net ‘n beroep nie… dit is ‘n roeping.  Sy maak ‘n geweldige verskil in die lewens van menige kind.

Nog nooit vantevore het ek ‘n onderwyser(es) gaan bedank nie.  Dit het ‘n jong seun geneem om my oë oop te maak en te onthou dat ons ook erkenning moet gee wanneer iemand dit verdien.  Daar is baie goeie onderwysers en die omstandighede waaronder hulle daagliks werk, is verseker nie ideaal nie.  Hoeveel van ons bedank hulle?  Die teksgedeelte gee ‘n mens baie stof tot nadenke. 

Miskien kan jy hierdie oueraand gaan om een van hierdie slawe te bedank wat so selfloos ons kinders vir die toekoms voorberei.

Rus sag

Eksodus 20:12  “Eer jou vader en jou moeder, dan sal jy lank bly woon in die land wat die Here jou God vir jou gee.

Ons maak so maklik planne sonder dat ons weet wat die toekoms inhou.  Moet my nie verkeerd verstaan nie.  Ek sê nie ons moet nie vooruit beplan nie.  Ons moet beplan.  Jy moet ‘n begroting hê sodat jy weet wat jy met jou inkomste gaan doen en jy moet prioriteite hê sodat die hoogste prioriteit voorkeur kan geniet.

Ons moet egter daarvan bewus wees dat ons planne dalk nooit sal realiseer nie.

Vandag presies ‘n jaar gelede het ek ons huis verlaat soos elke ander oggend.  Omdat ek in die middestad werk, moet ek vroeg ry (5h00).  Ons blinde kat was nog die oggend onrustig en ek het haar na my ma se kamer geneem, saggies sodat ek haar nie pla, omdat my ma altyd net geweet het hoe om haar te kalmeer.  En toe is ek by die huis uit.  Min het ek geweet dat dit die laaste keer sou wees dat ek my ma lewend sou sien.  Sou ek sonder om te groet (omdat ek haar nie wou wakkermaak nie), haar kamer verlaat het?  Sou ek vir ‘n uur in die verkeer gaan sit het eerder as om tyd met haar deur te bring?  Sou ek haar nie vir oulaas gebel het nie? Nee beslis nie, maar ek het nie geweet nie.

Later die oggend sou ‘n oproep my wêreld in duie laat stort.  My ma is oorlede.  Ek kan nie aan jou beskryf hoe dit gevoel het nie.  Vir altyd sal ek myself verwyt dat ek nie die tyd met haar spandeer het of dat ek nie daar was in haar donkerste uur nie.  Ek moet egter vrede maak, want dit was God se plan.  My planne was anders, maar ek moet berus by Sy planne.  Dalk is dit tog beter dat ons nie weet wat vir ons voorlê nie.

Waardeer jou ouers asb.  Ek moes beide my pa en my ma binne vier maande aan die dood afstaan.  Hul laat ‘n leemte wat niks kan vul nie.

Rus sag my dierbare ma en pa.

Prioriteite

Jakobus 2 : 2 – 6  Sê nou daar kom in julle samekoms 'n man in met goue ringe aan sy vingers en met deftige klere aan en daar kom ook 'n brandarm man in met ou klere aan, en sê nou julle maak 'n ophef van die man met die deftige klere en julle sê vir hom: “Kom sit u hier gemaklik,” maar vir die arm man sê julle: “Gaan staan jy daar anderkant” of: “Kom sit hier by my voete,” het julle dan nie onder mekaar onderskeid gemaak en mense op grond van verkeerde oorwegings beoordeel nie? Luister, my liewe broers! Kies God nie juis dié uit wat in die oë van die wêreld arm is, om ryk te wees in die geloof en om die koninkryk in besit te neem wat Hy belowe het aan dié wat Hom liefhet nie?  Maar julle behandel die arm man met minagting. Is dit nie die rykes deur wie julle uitgebuit word nie, en is dit nie hulle deur wie julle voor die hof gesleep word nie?

Armoede is niks nuuts nie...  Mense wat finansiëel swaarkry ook nie.  Wat wel anders is, is dat dit nie meer so maklik soos in die verlede is om te oorleef as jy geen inkomste het nie.  Ons kan nie hoenders en skape aanhou wat ons van vleis en eiers sal voorsien nie.  ‘n Groentetuin kan ons nog aanlê, maar dan moet ons geld hê vir die waterrekening en natuurlik moet daar water beskikbaar wees.  Die lewe is duur.  Sekere goed moet jy koop of voor betaal. 

Ons kerk onderhou tans 13 gesinne finasiëel.  Dit kan nie maklik vir daardie mense wees om van aalmoese te leef nie.  Elke dag raak die werkloses meer. 

Jy besef ook nie hoe moeilik dit is alvorens jy nie jouself in daardie bootjie bevind nie.  Ons oordeel maklik… hulle is te lui om te werk, dis hoekom hulle bedel…   So katagoriseer ons mense.  Ons kyk hulle op en af en besluit of hul suksesvol is al dan nie…  Vul jy ‘n vorm in, of doen aansoek vir krediet, wil hul weet in watter inkomstegroep jy val, want hoe hoër die inkomste, hoe beter wil hul jou hanteer.

Dit alles druis in teen Jakobus 2.  Voor God is ons almal dieselfde… om die waarheid te sê God het nie veel ooghare vir sogenaamde rykes nie.  Laat daar geen onderskeid wees, behalwe tussen die wat Hom liefhet en die wat Hom nie liefhet nie.

God is besig om jou voor te berei

Jesaja 6 : 8 Toe het ek die Here hoor vra: “Wie kan Ek stuur? Wie sal ons boodskapper wees?” Ek het geantwoord: “Hier is ek! Stuur my!”

William Carey het maar altyd met sy gesondheid gesukkel.  Daar was klein kindertjies in die huis en sy vrou was reeds swanger met nog enetjie.  Jy kan jou indink dat hul lewe nie maklik kon wees nie (baie soos ons eie lewe).  Baie mondjies om te voed en min geld, met hom wat knaend siek is terwyl sy vrou weereens swanger is.  William, ‘n gebore Engelsman, het geroepe gevoel om in Indië sendingwerk te gaan doen.  Soos baie sendelinge, het sy beroep niks met sendingwerk te doen gehad nie.  Toe hy hierdie behoefte met ‘n groep predikers deel, het hulle vir hom gesê:  “As God die heidene wil red, sal Hy dit sonder jou of ons hulp doen.”

William het hom egter nie laat afsit nie.  Hy het voortdurend gewonder wat van die verlore siele in Indië sou word as hy nie gaan nie.  Op die ou end het hy gegaan en hy word genoem ‘die vader van moderne sendingreise’.  Sy prestasies in Indië is amper oorskadu deur die hoeveelheid struikelblokke wat hy moes oorkom.

Later sou William terugkyk en besef dat die struikelblokke wat hy tuis moes oorkom, hom voorberei het vir dit wat vir hom as sendeling sou voorlê.  

Ons besef nie altyd hoekom ons so swaarkry nie. Wanneer God egter ‘n streep trek deur ons swaarkry, word die negatiewe (-) ‘n voordeel (+) wat tot sy eer gebruik kan word.

Jesaja was gewillig om te gaan, maar ‘n seraf moes eers sy lippe met ‘n kool aanraak sodat sy skuld uitgewis en sy sondes vergewe kon word.  (Jesaja 6 : 6 - 7)

Jou pyn is heel moontlik voorbereiding vir ‘n lewe tot eer en verheerliking van God.

Bid die bloed van die Lam oor hulle

Openbaring 12 : 11  En hulle het Hom self oorwin op grond van die bloed van die Lam en die boodskap waaroor hulle getuig het

Voordat Irene Park ‘n toegewyde Christen geword het, was sy ‘n heks in die die staat Florida.  Sy het op jong seuns en meisies gefokus omdat hul so kwesbaar was.  Eintlik was hul maklike teikens. Te midde van hul worstelstryd om aanvaarding en die uitdagings en onsekerheid wat hul as tieners in die gesig gestaan het, kon sy hul van jongs af bearbei en nie net blootstel, maar intrek by okkultiese aktiwiteite.  Sy vertel dat sy egter nooit die kinders kon bereik wie se ouers hulle beskerm het deur vir hulle in die naam van Jesus te bid nie, want die bloed van die Lam het hul omvou.  Hulle was onaantasbaar, gebind aan Jesus Christus.

Ons hoor dat Godsdiens nie meer plek het in skole, want dit sluit sekere kinders wat ander gelowe aanhang, uit.  Een geloof mag dus nie bo ‘n ander bevoordeel word nie.  Dis ‘n mooi en edele verduideliking.  Ons behoort verdraagsaam en toegeeflik te wees, maar nie waar dit by God kom nie.  God is nommer een en daarna volg die res.  So word Godsdiens afgewater tot iets minder belangrik wat ons kinders onmiddellik meer vatbaar maak vir enige ander invloede.

As ouers moet ons besef die verantwoordelikheid om ons kinders van God te leer, begin en eindig by ons.  Onthou, kinders is geskenke uit God se hand.  Ons sal eendag verantwoording moet doen oor daardie kind se opvoeding.  As ons nie ons kinders anker in God nie, gaan hulle ronddobber en die eerste beste strooihalmpie aangryp, dit mag dalk net die okkulte wees. Deur die Bybel kan ons ons kinders leer van aanvaarding, liefde, om te behoort en dat hul uniek en spesiaal is.  Ons kan nie meer op skole staatmaak om ons werk vir ons te doen nie. 

Soveel Christene wil siele vir God werf, maar ons eie kinders gaan verlore.  Is dit nie waar ons moet begin nie?

Klein jakkalsies

Hooglied 2:15  “Vang vir ons die jakkalse, die klein jakkalsies wat die wingerde verniel, ons wingerde wat al bot.

God haat egskeiding.  Wat God saamgevoeg het, mag niemand skei nie.  Ek glo stellig ons skei te maklik.  God kan enige huwelik red.  Daar is nie meer daardie volharding en deursettingsvermoë wat die huwelik aanbetref nie. As die een nie wil werk nie, dan beeindig ons dit en beweeg aan na die volgende.

‘n Mier is baie klein, maar ‘n mier kan jou huis onder jou wegdra en laat ineenstort.  Dit is hoekom ons bedag moet wees op die klein irritasietjies wat ons huwelik insluip en van binne vernietig. 

Selfsugtigheid:  Neem mekaar in ag.  In ‘n huwelik is daar twee mense.  Dit gaan oor gee en neem.  Wanneer jy begin gee, sal jy sien hoeveel jy terug ontvang.  Gee al ontvang jy niks in ruil nie.  As selfsug verdwyn, sal jy hom/haar met respek behandel en nie jou eie belang voorop stel nie.

Stilstuipe:  Wat bereik jy nou eintlik met stilstuipe?  Eenvoudig beskou is dit ‘n kompetisie om te kyk wie die langste die ander kan straf, maar eintlik verloor jy wat in stilstuipe verkeer die meeste.  Gebrek aan kommunikasie, is een van die grootste oorsake van egskeiding.  As jy bang is jy gaan jou humeur verloor, raak eers kalm, maar praat dan wel die saak uit.  As jy voel jy kan nie oor die onderwerp praat nie, sit jou emosies eenkant, maar praat wel oor die saak.

Jaloesie:  Hierdie is ‘n tweesnydende swart.  As jy ‘n jaloerse natuur het, praat met jou maat voor jul troue en sorg dat hy/sy weet wat hul moet doen om jou veilig te laat voel.  As jy nie jaloesie kan verdra nie, maak seker jou maat is nie jaloers nie.  Jaloesie kom gewoonlik na vore omdat een maat die ander probeer vermaak of omdat daar rede tot jaloesie is.  Die groenoogmonster kan enige huwelik laat wankel.  Wanneer jy trou is daar net twee mense (plus God) in daardie huwelik.  Daar is nie plek vir ‘n derde persoon nie.  Partykeer is die jaloesie nie a.g.v. ‘n ander persoon nie, maar omdat een party te veel tyd aan ‘n spesifieke aktiwiteit spandeer.  Jou maat behoort die middelpunt van jou bestaan te wees (weereens naas God), nie jou werk, jou fiksheid, jou gholf of kerk aktiwiteite nie.

Ongeduld:  As jy kort van draad is, werk daaraan alvorens jy trou, want na die huwelik gaan jou ongeduld eers op die proef gestel word.  Pare moet ook weet wat mekaar se ‘hot buttons’ is.  As jou ‘hot button’ stiptelikheid is, sorg dat jou maat weet sodat hy/sy kan sekermaak hulle beproef jou nie.  As jou ‘hot button’ koue kos is, sorg dat jou maat dit weet.  Iemand kan nie ruik wat jou pla nie.  Met tyd is dit asof meer dinge mekaar irriteer en dit behoort nie so te wees nie, want liefde behoort alles te oorbrug.

Herken daardie klein jakkalsies.  Daar is nog baie van hulle.  Jy kan nie teen ‘n vyand veg wat jy nie ken nie.  Dit mag wees dat God egskeiding haat, maar hy is lief vir die huwelik.  Maak Hom deel van jul span.  ‘n Man en ‘n vrou is immers ‘n span… twee karperde wat saam die wa deur die drif trek.

Jukke

Jesaja 10 : 27  In dié tyd sal Hy die las verwyder wat hulle op julle skouers gelê het, en ook hulle juk van julle nek af; die juk sal heeltemal van julle af afgeruk word.

Wanneer hul die juk op die osse plaas, is dit om die dier te beheer.  Dit beperk sy bewegings en sodra die os van koers af beweeg, word die juk gebruik om hom terug op koers te bring.  ‘n Os is baie groter en sterker as ‘n juk, tog is dit hierdie stuk hout wat die os daarvan weerhou om te gaan waar hy wou.

Sommige mense besef nie eens dat hul ook met ‘n juk om hul nek deur die lewe gaan nie. Hul wonder hoekom hul nie suksesvol is of vooruit gaan nie, maar hul kom nie agter dat dit die juk is wat hul terughou nie.  Elke keer dat hul buite hul gemaksone wil beweeg, hoor hul die stem van iemand wat hul lank gelede oortuig het dat hul dit nooit sal maak of nie goed genoeg is nie.  Hul hoor weer hoe hul tekortkominge aan almal uitbasuin word.  “Jy’s te stadig.  Jy’s te vet.  Jy’s nie mooi genoeg nie.  Niemand hou van jou nie.  Jy gaan nooit ‘n man/vrou kry nie.  Rugby is nou maar eenmaal nie vir jou nie.”  Partykeer is jou juk die gebrek aan voldoende finansies.  Ander kere is die juk die mense in jou lewe wat jou terughou. 

Hoekom bly ons soos ‘n os, tevrede met die juk wat ons bewegings kniehalter?  Dit hoef nie so te wees nie.

Hoor vandag dat God in staat is om enige juk af te haal en te vernietig. Hy maak jou waarlik vry.  Beroep jou op God om jou te verlos van die leuens wat jy tot nou toe oor jouself geglo het.  

En kies dan om te vergewe, sodat jy nie een juk vir ‘n ander verruil nie.

Gehoorsaam en Gewillig

Isaiah 1 : 10  “If you are willing and obedient, you will eat the good things of the land.”

Vandag se teks kom uit die Engelse Bybel en handel oor gewilligheid en gehoorsaamheid… die sleutel tot alle goeie dinge.  Verskeie kere in die Bybel sien jy dat God Sy volk wil seen.   Net sodra dit goed gaan, dwaal hul egter af en veroorsaak hul ongehoorsaamheid dat seëninge hul ontneem word.  Keer op keer bring God hul op hul knieë en terug na Hom en meeste van tyd verwelkom Hy hul terug met nog meer seëninge.

Let egter op dat gehoorsaamheid begin by gewilligheid. Jy moet bereid / gewillig wees om te verander… om te gehoorsaam.  Gehoorsaamheid beweeg God.  Dit gaan egter nie net oor aksies nie, maar ook oor ons motiewe.  Gehoorsaam ons omdat ons God eer en Hom lief het, of gehoorsaam ons omdat ons glo ons gaan God manipuleer.

Om God te dien omdat jy verplig voel of omdat jy dink dat dit dan beter met jou sal gaan, is teen-produktief.  Om jou Bybel te lees omdat jy dink dit is die regte ding, gaan nooit die Woord en die boodskappe daarbinne vir jou ontsluit nie. 

Wanneer jy egter totaal oorgee en God wil gehoorsaam omdat jy honger om ‘n verhouding met Hom te hê en die geheimenisse van geloof en ware kindskap te ontdek, dan gebeur iets binne jou wat jy nie kan verduidelik nie. Ewe skielik is dit lekker om ondergeskik te wees… dit gaan nie meer net oor jou of wat jy daaruit kan kry nie. Jy vind dat jy iemand word van wie jy hou… iemand wie jy nooit gedink het jy kan wees nie.  

Jou wonderwerk sal kom

Psalm 40 : 1  Ek het met hunkering op die Here gewag, Hy het my geroep gehoor.

Alles wat die moeite werd is, neem tyd.  As ‘n bouer ‘n huis sou begin bou dieselfde dag dat die fondasie gelê is, sal dit nie ‘n baie stewige huis wees nie.

Ek dink ons reken as God sien hoe ongeduldig ons is, sal hy vinniger beweeg.  Dit is ongelukkig baie ver van waar.  God werk volgens Sy eie skedule, wat, so weet ons, nie noodwendig in lyn met ons behoeftes en begeertes is nie.  Tog moet ons onthou dat net omdat die deur nog nie oopgegaan het nie, dit nie beteken dat God ons nie meer gaan help nie. 

Natuurlik ontstaan die vraag dan:  “Wat maak ek terwyl ek wag?  Hoe hou ek my ongeduld in toom?  En hoe keer ek myself om nie moue op te rol en self iets aan die situasie te probeer doen nie?”  Bly op jou knieë en vind jou vreugde in God se beloftes. Lees weer Habakuk 3 : 17.  Ten spyte van jou situasie, kan jy God steeds loof en prys.

Wanneer die tydsberekening reg is, sal Hy maksimum glorie en jy maksimum voordeel uit die situasie sal trek.  As dit aangejaag gaan word, gaan dit heel moontlik nie ‘n wonderwerk wees nie.  Selfs al was Jesus 4 dae laat vir Lazarus, was die tyd vir die wonderwerk perfek.  Almal het reeds hoop verloor en toe kom Jesus deur.

Wag op jou wonderwerk, want God hoor jou geroep.

Delegeer en vertrou

Eksodus 18 : 18 Jy kan dit nie alles op jou eie doen nie…

Dalk is jy ook iemand wat alles self probeer doen.  Jy wil nie jou man of kinders vra om te help nie, want jy is nie lus om die gemors agterna op te ruim nie of jy dink hulle is te stading of kan dit nie goed genoeg doen nie, so jy sal dit dalk weer moet oordoen.

Moses was ook besig om homself te ooreis, nie net fisies nie, maar ook geestelik en emosioneel. Kan jy jou indink hoe uitdagend dit moet wees om 2 miljoen mense te lei? Juis toe het sy skoonpa die woorde in vandag se vers teenoor hom geuiter.  Net iemand wat volwasse, nederig en wys is, sal raad aanvaar en erken dat hul eintlik op die verkeerde pad is. Dis ‘n teken van krag, nie swakheid nie. 

Ook leiers moet leer om diegene wat diegene wat aan hul rapporteer en na hul opsien te vertrou.  Dit is die enigste manier hoe hul kan leer. Ek het onlangs na ‘n program oor Megaboere gekyk waar ‘n baie suksesvolle boer gesê het:  “Ek stel net mense aan wat meer weet as ek.  Enige een van my mense kan enige dag instap en my uitwerk.”  President Theodore Roosevelt het gesê:  “Die beste bestuurder is die een wat genoeg begrip het om bekwame mense te kies om te doen wat hy gedoen wil hê, en die selfbeheersing het om homself te weerhou om in te meng terwyl hulle dit doen. 

Ons is geskape om interafhanklik te wees, nie onafhanklik nie.  Moses is op die ou einde versterk deur diegene aan wie hy gedelegeer het.  Dit het hom as leier versterk en toegelaat om meer tyd met Goddeur te bring.

Leierskap gaan daaroor dat jy ander bekwaam om die taak gedoen te kry, nie om dit self te doen nie.

Laat God bestuur

Romeine 1 : 12  En nou doen ek 'n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen.

Ons dominee het Sondag ‘n boodskap gelewer wat vir my so treffend was, dat ek dit graag met jou deel.  Ek dink wat die boodskap regtig huis toe gebring het was dat hy dit gedemonstreer het met ‘n analogie oor die bestuur van ‘n motor.  So hierdie boodskap is dan nie my eie.  Ek gee erkenning aan Ds Reynold.  Dis ‘n boodskap wat ons leer om alles in God se hande te laat.

Onthou jy nog toe jy leer bestuur het?  Die persoon wat jou geleer het, was seker banger as jy, want hy of sy het geen beheer oor daardie voertuig gehad.  So moet ons leer om beheer oor te gee, maar party van ons doen dit nie.  Ons kry dit nie reg nie.  Vir party van ons is God nie eens in die prentjie nie.  As jy die analogie van die motor verder neem, staan God buite die motor.  Hy wil saamry, maar ons laat Hom nie in ons lewens toe nie.  In ander gevalle moet ons erken dat ons agter die stuur sit en God langs ons.  Dis lekker om God naby te hê en te kan raad vra of vir hulp wanneer ons hom nodig het bv God, help met my finansies… God, my huwelik is in ‘n krisis… God, help asb, ek het verbrou, maar weet U kan my hier uitkry…  Ons klou egter aan die stuurwiel en sleutel vas.  En hoekom wil ons nie laat gaan nie?  As ons eerlik moet wees, is dit ten diepste omdat ons God nie vertrou nie.  Skokkend, maar waar.  As ons God wel vertrou, sal ons Hom toelaat om die stuurwiel te neem.  Hy ken die pad, die slaggate, die beste roete… Ons het absoluut niks om te verloor nie.

Tot my skande moet ek erken, dat ek baie keer die sleutels afneem en self bestuur en God in die passassiersitplek laat.  Maar ek was bly dat Ds Reynold die skille van my oë laat val het. Van daardie oomblik het ek my voorgeneem om volkome oor te gee. God is aan die stuur en ek sit gerieflik langsaan.  En weet jy, sedert daardie oomblik, slegs 2 dae gelede, is my lewe soveel meer georden en val alles eenvoudig in plek.

Jy moet verander

2 Korintiërs 5:17  Iemand wat aan Christus behoort, is 'n nuwe mens. Die oue is verby, die nuwe het gekom

In ‘n wêreld wat oorloop van selfsug, het ek twee voorbeelde die naweek teëgekom van ware naasteliefde.

Hierdie tyd van die jaar vind die Dakar plaas.  Stephane Peterhansel het al 29 keer deelgeneem waarvan hy 13 wedrenne gewen het.  Tydens die 7de skof tref Stephane ‘n rots en daar is groot skade aan sy motor.  Hy staan langs die pad en probeer kyk wat hy kan doen.  Sy spanmaat, Cyril Despres, stop en sê vir hom dat hul moet kyk watter parte van sy motor hy dalk kan gebruik sodat hy die wedren kan voltooi.  Kyk net hoe selfloos tree Cyril op.  Almal skryf tog in om te wen, vir eer en geld.  Hier is sy geleentheid om die veteraan te klop.  Cyril dink egter nie net aan homself nie.  Hy help vir Stephane en die kan die wedren voltooi.

Ek hoor ook van die man in Indië wat as kind deur ‘n tier aangeval is.  Byna die helfte van sy gesig is weg en vreeslik vermink.  Vir jare word hy gespot en eenkant toe gestoot en dan kry hy die geleentheid om oorweeg te word vir rekonstruktiewe behandeling.  Die dokter waarsku hom dat dit pynlik gaan wees en dat hy bereid moet wees om ‘n jaar lank in die hospitaal deur te bring.

Arm soos hul is, besef die man dat sy gesin nie ‘n jaar lank sonder hom sal oorleef nie en hy wys die geleentheid van die hand om eerder vir sy gesin te sorg.

Hierdie twee voorbeelde laat ons ‘n bietjie dink.  Wat sou ek gedoen het in dieselfde situasies? Hoe tree ek teenoor ander op?  Gaan dit net oor myself, of plaas ek ander eerste.  Hoe kan ons God se gebod van naasteliefde uitleef as ons die middelpunt van ons eie bestaan is?  As ons bo-oor ander loop en net aandag aan hul sal gee as ons iets uit hul kan kry.

Dalk is dit tyd om ‘n bietjie dieper te kyk na elke situasie en jouself af te vra:  “Is hierdie nie dalk ‘n geleentheid om naasteliefde te betoon nie?”  Dit mag iets klein wees soos om iemand voorkeur in die verkeer te gee, of vir die bedelaar te glimlag.  Moet egter nie voortgaan met jou ou patroon nie.  Laat toe dat God jou verander, dat jy ‘n nuwe mens word.

Spreuke 11 : 2

Selfverheffing bring vernedering;  wie nederig is, het wysheid.

Matteus 5 : 9

Geseend is die vredemakers, want hulle sal kinders van God genoem word.

Spreuke 5 : 22

Die oortreding van die goddelose agterhaal hom, hy draai hom vas in sy sonde.

Jesaja 49 : 15 - 16

Ek sal nou nie vergeet nie.  Ek het jou naam in my handpalms gegraveer.

Psalm 62 : 2

Net by God vind ek rus, van Hom kom my redding.

Psalm 139 : 14

Ek wil U loof, want U het my op 'n wonderbaarlike wyse geskep.  Wat U gedoen het, vervul my met verwondering.

Efesiërs 2 : 8

Julle is inderdaad uit genade gered, deur geloof.  Hierdie redding kom nie uit julleself nie; dit is 'n gawe van God.

Spreuke 16 : 19

Liewer eenvoud saam met nederiges as om saam met hoogmoediges van roof te lewe

Matteus 10 : 19

Moet julle nie bekommer oor hoe of wat julle moet sê nie, want op daardie oomblik sal God aan julle gee wat julle moet sê