Die monster binne my

“Hulle het my pa doodgemaak en hulle het ook my oom doodgemaak, wat die President van Amerika was,” het Robert Kennedy Jr gesê en toe bygevoeg “en daar is iets wat ook besig is om my dood te maak.  Ek kan myself nie weerhou van sterk drank nie.  Dis soos ‘n monster binne my; om my te vergryp aan drank is besig om my dood te maak.”

Ironies genoeg is Robert Kennedy nie die enigste mens met hierdie monster binne hom/haar nie.  Daar is soveel mense wat dag in en dag uit hulself aan drank vergryp.  Drank isoleer hul van alles en almal rondom hul.  Dit stomp hul af teenoor hul geliefdes en oorheers hul denke.  Drank het ‘n houvas op die individu wat alle logika te bowe gaan.  Soveel oënskynlik suksesvolle mense koester hierdie monster jaloers binne hul.  Hul ontken dat daar ‘n probleem is en sommige probeer dit regverdig, maar dit bly ’n problem.

In Matteus 8 : 32 lees ons hoe Jesus die bose geeste uitgedryf het.  “Gaan!” het Hy vir hulle gesê. Hulle is toe uit die mense uit en het in die varke ingevaar. Die hele trop het meteens op loop gesit teen die hang af, die see in, en het in die water versuip.  Die bose geeste was dalk nie die drank duiwel nie, maar as Jesus dit kon doen, kan Hy jou ook verlos van die monster binne jou.  Vra Hom om jou te help en word ‘n nuwe mens – eis jou lewe terug.