Nou poorte

Openbaring 3 : 20 Kyk, Ek staan by die deur en Ek klop. As iemand my stem hoor en die deur oopmaak, sal Ek by hom ingaan en saam met hom die feesmaal hou, en hy saam met My.

Ek lees van iemand wat die volgende resep gebruik om sukses in hul lewe te verseker: Select, expect, project and collect. 

Dit beteken jy moet besluit wat jy wil bereik en dan jouself as’t ware heeltyd daaraan te herinner dat dit is waar jy binnekort gaan wees.  Jy projekteer dan die sukses deur voortdurend aan jou potensiële sukses te dink en om seker te maak alles wat jy doen is daarop geprojekteer.  Die finale stap is natuurlik die smaak van sukses wanneer jy dit wat as ‘n gedagte of droom begin het, bereik.  Beslis ‘n wenresep vir sukses.

Ek het onmiddellik gewonder hoeveel mense so ingestel is op hul geestelike reis.  Suid-Afrika word gesien as ‘n Christelike land, maar jy sien min mense wat ‘n doelbewuste keuse gemaak het om volgens Christelike beginsels te leef, maak nie saak wat ander rondom hul doen nie.  Dis asof die ‘me, myself and I’ virus vinniger as die Ebola virus  versprei.  Wanneer jy verwag om hemel toe te gaan, moet jy leef volgens sekere beginsels en dit projekteer… nie net op jouself nie, maar ook op ander. Dit gaan nie oor my op aarde nie, maar oor die verskil wat ek in ander se lewens maak. Slegs dan sal ons eendag die sukses smaak om die goue poorte binne te gaan.

Hoe kan mense so op aardse sukses ingestel wees, maar nie mik na ewige sukses nie? Niks wat ons hier op aarde bereik of versamel, gaan ons toegang of ‘n voorsprong gee tot die hemel nie.   Groot verandering begin dikwels by een persoon. Daardie verandering begin by jou en my.