Quantum Leaps

Matteus 6

In ons hande sou 2 vissies en 5 broodjies, net dit gebly het.  In God se hande het daardie maaltyd vir een vermenigvuldig in so ‘n mate dat dit ‘n skare van meer as 5000 mense kon voed, vrouens en kinders uitgesluit.  En… daar was na die tyd nog twaalf mandjies vol oorskiet bymekaargemaak.

Wanneeer ek en jy aan moontlikhede dink, dink ons dikwels net binne ons beperkte raamwerk, gemeet aan ons ervarings uit die verlede.  “Ek is nie ‘n sakeman/vrou nie, so ek sal seker altyd vir ‘n baas moet werk…  Omdat ek nie skool klaargemaak het nie, sal ek vir altyd hierdie onbelangrike werk doen… Finansieël is ek so diep in die moeilikheid dat ek nooit weer op my voete sal kom nie… Ek het nie die nodige fondse om verder te studeer nie…  Waar ontmoet ek op my ouderdom weer ‘n lewensmaat?“

Geloof is die antwoord.  As ek glo dat God deure vir my kan oopmaak, sal Hy.  As ek glo dat God die ontmoontlike kan doen, sal Hy.  Ons grense is ons s’n omdat ons onsself nie toelaat om God Almagtig vir die onmoontlike te vertrou nie. 

Net soos enige jy ontwikkel ek ook soms tonnelvisie;  ‘vergeet’ ek ook dat God gereed staan om te help, omdat ek vasklou aan my 2 vissies en 5 broodjies.  Glo my, ek weet, dis nie maklik om daardie ‘quantum leap of faith’ te gee nie.  Soms bid ons vir ‘n wonderwerk, maar in ons hart twyfel ons aan die moontlikheid daarvan. 

Maar dan moet ek ook getuig van die kere dat my waagmoedigheid, daardie kere dat ek oë toegeknyp het en as’t ware ‘gespring’ het omdat ek geglo het dat Hy my sou vang, beloon is ver bo my verwagtinge.  Wanneer ons daardie tree in geloof gee en onwrikbaar glo dat God ‘n waarmaker van Sy woord is, oortref Hy ons wildste drome. 

Geloof is juis om dit te glo wat jy nie kan sien nie.  Geloof is om, onder leiding van die Heilige Gees daardie eerste tree in geloof te gee.   Sou dit ‘n wonderwerk gewees het as daar 2 ton vis en 5 ton broodjies was om ‘n skare te voed.  Nee, verseker nie.  Weet God hoe bang ons is om kanse te vat?  Natuurlik weet Hy, want Hy ken selfs ons gedagtes, staan daar in die Woord.  Verwag Hy van ons om Hom te vertrou, ten spyte van… absoluut!

Vandag wil ek jou aanmoedig om jou eerste geloofsprong te gee; God blindelings te vertrou vir dit wat jy dink onmoontlik is. Neem daardie "Quantum Leap of faith".