Waarvoor vertrou jy God?

Romeine 4 : 19 – 21  Al was hy sowat honderd jaar en al het hy dus goed besef dat sy liggaam reeds gedaan was en dat Sara te oud was om kinders te hê, het sy geloof nie verswak nie.  Hy het nie in ongeloof begin twyfel aan die belofte van God nie, maar hy is in sy geloof versterk en het aan God die eer gegee.  Hy was ook ten volle daarvan oortuig dat God mag het om te doen wat Hy beloof het.

Die Bybel is deurspek met voorbeelde van mense wat God vertrou het vir die onmoontlike.  Abraham was maar een van hulle.  God het vir Abraham beloof dat hy ‘die vader van vele nasies sou wees.  Dit het nie sin gemaak nie, want Abraham het al aangestap in jare en sy vrou was verby die ouderdom waar sy kinders kon baar.  Abraham het nie net aan God se belofte vasgehou nie, hy was vas oortuig dat God sou doen wat Hy beloof het.  Die belofte is egter nie oornag nagekom nie.  Hy sou amper ‘n eeu oud wees alvorensGod se belofte sou realiseer.

Volgens vandag se teks, het Abraham hom egter nie in hierdie wagperiode blindgestaar teen die feite nie.  Abraham het nie na sy eie liggaam gekyk of die vele redes hoekom hy nie die vader van vele sou word nie.  Inteendeel, hy het na God se getrouheid gekyk… na Sy almag en krag…  en voortdurend het hy God geprys.  Abraham het geloof prakties toegepas wat God toegelaat het om te doen wat Hy moes.

Waarvoor vertrou jy vir God?  Is jy amper te bang om dit hardop te uiter omdat dit in jou oe onmoontlik lyk?  Dink jy dat dit nie eens die moeite werd is om daaroor met God te praat nie?  Het jy al gebid en niks gebeur nie?  

Verskuif jou fokus vandag van die aardse realiteite na God se realiteite. Is God ‘n waarmaker van Sy Woord?  Het Hy al vantevore vir jou deurgekom?  Is daar getuienisse van mense wat jy weet in wie se lewens God die onmoontlike vermag het?

Wel, jy is niks minder in God se oe as Abraham of enige ander persoon nie.  Net soos wat God geweet het wat Abraham se hartewens was, so weet Hy ook van joune.  Praat met Hom daaroor en begin om Hom te loof en prys omdat jy onwrikbaar glo dat Hy jou gebede sal beantwoord.  Geloof is gewoonlik die sleutel wat God nodig het om deure vir jou oop te maak.