Krakies in die damwal

Spreuke 17:14 Om rusie te begin is om ‘n damwal te breek; staak liewer die getwis voor die vloed jou tref

Ons het aangetroude familie gehad met ‘n oom en tannie wat voortdurend rusie gemaak het, maak nie saak wie teenwoordig is of waar hul was nie.  Hulle het oor alles verskil en die een het nooit na die ander se mening geluister nie.  Hierdie leefstyl is ook na die volgende geslag oorgedra, want die kinders het ook nooit beleefd teenoor die ouers of hul lewensmaats opgetree nie, want die enigste verwysingsraamwerk was die van hul ouers wat voortdurend op die oorlogspad was.  Soveel as wat hul baklei het, kon hul ook nie sonder mekaar leef nie.  Die oom is eerste oorlede en ses maande later die tannie.  Die damwal in die geval, het jare gelede al gebreek en ‘n vloed het oor die gesin gespoel wat almal vernietig het.

Dit is altyd vir my so interessant dat verliefdes so saggies met mekaar kan praat en mekaar steeds kan hoor, want hulle is ingestel op mekaar se behoeftes en gevoelens.  Wanneer die liefde vervaag, dryf twee mense van mekaar weg, wat ‘n gaping veroorsaak, en dan word daar nooit gefluister nie, maar word dit ‘n gil kompetisie.  Terwyl jy op jou hardste jou mening probeer oorbring, sal jy nooit na die ander persoon luister nie, want terwyl die ander persoon teruggil is jy alreeds besig om jou teenargument to formuleer.  So daar is geen wenners, net ‘n damwal wat besig is om mee te gee, want elke rusie veroorsaak nog ‘n krakie.

As jy in ‘n verhouding is waar julle sukkel om mekaar uit te hoor, gebruik die pen beginsel.  Die persoon wat die pen vashou praat en die ander persoon mag nie die spreker in die rede val nie.  As die persoon wat die pen vashou klaar sy/haar standpunt gestel het, word die pen oorgegee en nou is die rolle omgeruil.  Sodoende kry elkeen voldoende ‘lugtyd’ en voel dat hy/sy gehoor word. 

Die lewe is te kort om in onvrede met mekaar te leef.  Alle verskille kan oorbrug word as daar liefde is en ‘n wil om mekaar te verstaan.  Vra God, wat jul saamgebind het, om jul te help om jul verskille te oorkom.