Sodat die profesie vervul kan word

Matteus 21 : 2-5  en vir hulle gesê: “Gaan na die dorpie daar reg voor julle, en net soos julle inkom, sal julle daar 'n donkie kry wat vasgemaak is, en 'n vul by haar. Maak haar los en bring hulle vir My.  En as iemand vir julle iets daaroor sê, antwoord dan: Die Here het hulle nodig, en Hy sal hulle gou weer terugstuur.”  Dit het gebeur sodat die uitspraak van die profeet vervul sou word:   “Sê vir Sion: Kyk, jou Koning kom na jou toe; Hy is nederig en Hy ry op 'n donkie, op die vul van 'n pakdier.”

Die dissipels is toe daar weg en het die donkie gevind en hom na Jesus gebring.  Hulle het hul eie boklere op die donkie gesit en Jesus het daarop gaan sit.  Soos Jesus Jerusalem binnegery het, het die skare ook hul boklere op die pad voor Jesus gegooi en ander het palmtakke (wat as ‘n teken van vrede beskou is), voor die donkie gegooi.  Terwyl Jesus voortgery het, het hy lofprysing aan Sy Vader betoon.  Almal het gewonder wie hierdie man is.  Daar was darem party wat geweet het en geantwoord het dat Hy Jesus die profeet uit Nasaret in Galilea was.

Jesus sou uiteindelik die Lam word wat ter slagting gelei word na die kruis.  Interessant om te onthou dat die Israeliete destyds 'n lam geslag het en die bloed aan hul deurkosyne gesmeer het om hul te beskerm.  Ook Sy bloed sou ons uiteindelik beskerm.

Wie sou ooit kon dink dat dieselfde skare wat hom vereer het toe  Hy op Palm Sondag deur Jerusalem binnegery het, later sou uitroep: “Kruisig Hom!”  ( Matt 27:23) 

Maar soos ons in die teks hierbo lees, was dit ‘n plan wat God al eeue gelede in plek gehad het.