Die kosbaarheid van tyd

Efesiërs 5 : 15 Wees versigtig hoe julle lewe; nie soos onverstandige mense nie, maar soos verstandiges.

Jonathan Edward was ‘n man wat sy Godgegewe intellektuele vermoëns ten volle gebruik het.  Op 13 is hy toegelaat tot Yale universiteit.  Op 17 het hy sy graad cum laude  behaal en op 26 was hy leraar van een van die grootste gemeentes in Massachusetts.  Hy was ‘n briljante filosoof en leraar wat vroeg in sy lewe reeds besluit het dat elke minuut van jou lewe saakmaak en dat jy die beste daarvan moet maak.

Maak jy die beste gebruik van elke minuut van jou dag of bestaan jy bloot van die een minuut na die volgende, die een dag na die ander?  Droom jy drome wat jy najaag, of bly dit bloot drome?  Wat doen jy om seker te maak dat nie een oomblik van jou lewe vermors is nie?  So logies as wat dit is, besef min mense dat jy die minuut wat so pas verby is, nooit weer kan terugkry nie. 

As jy vir Joost van der Westhuizen sou vra hoe belangrik hy elke minuut van sy lewe ag, is ek seker daarvan hy sal jou oortuig dat tyd uiters kosbaar is as jy weet jy ly aan ‘n ongeneeslike siekte.

Laat elke minuut tel.