Mag ek asb die kartondoos kry?

Psalm 119: 103  Hoe aangenaam is U woord, soeter as heuning in die mond.

John Deist het jare gelede die Evangelical Christian Publishers Association by ‘n boekuitstalling in Moskou verteenwoordig.  Die owerhede het teësinnig ingestem dat hulle ‘n beperkte aantal Rusies vertaalde Nuwe Testamente mag uitdeel.  Mense het tougestaan om Bybels te ontvang en kort voor lank was al die Bybels uitgedeel.

 ‘n Man wat nie ‘n Bybel ontvang het nie, het gevra of hy asseblief die kartondoos waarin die Bybels was mag kry?  John was baie verbaas en wou weet wat hy met ‘n leë kartondoos wou maak.  “Dis nie net ‘n kartondoos nie, dit is heilig omdat dit die Heilige Woord van God vervoer het.  Mag ek dit asseblief kry?” het hy gevra terwyl trane oor sy wange gestroom het.

Lê jou Bybel dalk en stof vergader?  Dalk het jy lanklaas daaruit gelees.   Dalk voel jy dis ou nuus;  nie meer relevant nie.  Dalk voel jy, jy kry nie ‘n boodskap daarin nie.  Daar is steeds mense wat nie ‘n Bybel besit nie… mense wat ‘n begeerte het om die waarheid van die Woord in te drink. 

Ons het onlangs ‘n naweek op die platteland deurgebring waar winkels nog 13h00 op ‘n Saterdag toemaak.  Skielik het ek besef hoe bevoorreg ons is om ter enigertyd by ‘n winkel kan instap.  Wanneer jy gewoond raak aan iets, sien jy nie meer die waarde daarvan raak nie. Laat ons altyd besef hoe bevoorreg ons is om ter eniger tyd ‘n Bybel te mag oopslaan en lees... dit nooit as vanselfsprekend aanvaar nie.