Nowhere vs Now here

Psalm 37 : 23 Die Here bepaal die koers van die mens met wie se pad Hy tevrede is, en Hy ondersteun hom.

Soms voel dit vir ons asof ons  van God en mens verlate is;  asof alles verkeerd gaan.  Dit voel dalk vir jou of die wiele van jou lewe besig is om af te kom.

 ‘n Vriendin van my het onlangs afgetree en haar aftreegeldjies gebruik om ‘n eie besigheid te koop.  Kort voor lank het sy agtergekom hoe mense haar mislei het, van die man wat die vatbaarheidstudie gedoen het, tot die agent en die verkoper.  Toe sy agterkom dat sy ‘n kat in die sak gekoop het, was hul almal fort… met haar pensioen in hul sak.  Sy staan op die punt om alles te verloor.  Sy werk haar oor ‘n mik, kom met innoverende idees na vore om die besigheid se omset te verhoog, maar op die oomblik is dit ‘n kwessie van oorlewing.  Buitendien het die verhuurder geen simpatie met haar nie, en sy voel verantwoordelik vir haar personeel wat van haar afhanklik is vir ‘n inkomste.  Sy is mismoedig en teleurgesteld in mense en tot die dood moeg gewerk in ‘n tyd dat sy eintlik moes kon agteroorsit en haar silwer jare geniet.

Dalk voel jy vandag asof jy moeg gesukkel is, dat dit darem hoogtyd is dat die gety draai.

Sulke tye kan ons maklik in self-bejammering verval of ten beste voel dat God van ons vergeet het.  In Engels:  “God is nowhere” Die verskil tussen hierdie gevoel van mismoedigheid en hoop, is blote semantiek.  Weereens in Engels kan jy eerder lees:  “God is now here.”  When we think God is nowhere, he is actually now here.  Omdat Hy jou koers bepaal, sal Hy ook al die pad langs jou wees.