Wysheid vs sukses

Prediker 10 : 10 Dit betaal om jou verstand te gebruik.

Sukses is die spil waarom alles draai.  Van kleins af word kinders aangemoedig om sukses te behaal.  Sodra hul begin skoolgaan, word hul punte die maatstaf van hul sukses, al dan nie.  Op die sportveld word diegene wat uitblink geprys en op die hande gedra.

Teen die tyd dat die kind skool verlaat, word daar alreeds onderskei tussen diegene wat suksesvol is en diegene wat gemiddeld tot onder-presteerders is.  Presteerders studeer verder.  Gemiddeldes begin werk, as hul gelukkig is, op die heel onderste sport van die suksesleer.  

Boekwinkels is stampvol boeke wat jou kitsraad bied vir sukses.  As daar werklik ‘n resep vir sukses was, sou daar net een boek gewees het, of hoe?  Daar is egter ‘n groot verskil tussen sukses en wysheid.  Nie almal wat suksesvol is, beskik oor wysheid nie.

Bekende skrywer, Deon Opperman, het onlangs ‘n groot waarheid kwytgeraak toe hy gesê het dat hy die meeste uit sy mislukkings geleer het, maar niks uit sy suksesse nie.

Wysheid, of om jou verstand te gebruik, is die maat wat God vir jou afgemeet het  - die perfekte maat om jou tot die hoogtes te neem wat Hy vir jou ingedagte het. Dit mag jou dalk nie ryk en suksesvol maak nie, maar dis volmaak volgens Sy plan.