Help hulle

Titus 3:11 omdat jy weet dat so 'n man op die verkeerde pad is. Deur sy sonde bring hy die oordeel oor homself.

Dit is elkeen van ons se plig om iemand wat op die verkeerde pad is, reg te help.  Ons mag nie net ‘n blinde oog keer en hoop dat dit vanself sal regkom nie.  As ons dit nie doen nie, sal daardie siel verlore wees vir God se Koninkryk.

Maar dan moet ons ook onthou dat ons self sondaars is en nie mag oordeel nie.  Liefde op sigself kan verandering te weeg bring.  Gebed verrig wondere, maar ons kan moed opgee as God nie onmiddellik ingryp nie.  Soms besef ons nie dat Hy wel geantwoord het… dat ons die antwoord is… dat Hy van ons verwag om in te spring en daardie persoon te red.

Soms is iemand al soveel jare op die verkeerde pad dat jy glo hul sal nooit verander nie. Ander kere is dit net ‘n tydelike afdwaling.  Soms is die afdwaling skrikwekkend en dalk onvergeeflik, terwyl dit op ‘n ander keer net ‘n oomblik van onbesonnenheid was.

F B Meyer het gesê ons kan net oordeel as ons (i) weet hoe hard die persoon al probeer het (ii) weet hoe groot die versoeking was (iii) en onsself afvra, “Wat as dit ek was?”

Sportmanne sê altyd dat die beste spelers op die paviljoene sit.  Vanaf die paviljoen kan ons raad gee en die spelers vertel wat hulle eintlik moes doen, maar sou ons so goed gevaar het as ons op die veld was?