Kalmeer my kind

Handelinge 1 : 8 Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld.”

Tydens krisisse voel dit dikwels asof ons nooit heel aan die anderkant sal uitkom nie.  En partykeer reën die een na die ander krisis op ons neer.  Ons voel soos ‘n drenkeling, verswak en oorweldig deur die enormiteit van die oseaan rondom ons.  Ek het eendag van iemand gelees wat in ‘n swembad geval het en desperaat om hulp geroep het, oortuig dat sy gaan verdrink omdat sy nie kon swem nie.  Nadat iemand haar uitgehaal het, en gekalmeer het, het hy aan haar gewys dat sy in die vlak kant ingeval het en net moes staan, dan sou sy veilig gewees het. 

Ons spartel ook rond en roep om hulp, vas oortuig dat ons nie gaan oorleef nie… dat hierdie probleem ons gaan knak.  As ons egter vir ‘n oomblik sou ontspan en luister, sal ons God se stem hoor.  Kalmeer my kind.  Jy gaan nie verdrink nie.  Vertrou my – daar is vaste grond onder jou.  Ek is jou vaste grond. 

Jy is nie alleen nie.  Dit waardeur jy gaan, gaan jou nie verswelg nie.  Mense kan jou tenakom, teleurstel of seermaak… net Een kan jy vertrou… onvoorwaardelik.  Hou op spartel en reik uit na Hom.  En wanneer jy Sy krag ervaar, Hy jou gered het, gaan verkondig dit regoor die wêreld.