Afgedwaal?

Johannes 10 : 11  Ek is die goeie herder. Die goeie herder lê sy lewe af vir die skape.

Hoe dwaal ‘n skaap af?  Hy wei, kyk op en sien ‘n groener polletjie verder, loop daarheen... wei... kyk op... en so hou hy aan totdat hy ewe skielik besef hy’t heeltemal van die res afgedwaal. 

Presies net so word ons aandag ook van God afgelei.  Jy word in 'n Christelike huis groot, gaan gereeld kerk en Sondagskool toe.  Soms werk jy lang ure, soms is jy eenvoudig moeg, soms het jy net nie lus om jou Bybel te lees of  kerk toe te gaan nie - afgedwaal? 

By geleentheid gebruik jy 'n drankie of rook 'n sigaret om nie uit te wees en kort voor lank koop jy jou eie drank/sigarette, drink gereeld...  drink alleen... raak afhanklik van drank - afgedwaal?

Jy word saamgenooi na ‘n partytjie en daar wil jy deel van die groep wees so jy neem ‘n drankie, gee toe aan die groepsdruk en gebruik dagga.  Met die volgendepartytjie gebruik jy ecstacy... tik...ens en so gaan jy aan en kort voor lank is jy verslaaf – afgedwaal?

Eers laat jy die outjie toe om jou te soen, dan vat hy hier en later daar en voor jy jou kom kry het jy jou maagdelikheid verloor - afgedwaal?

Die goeie herder sal jou weer vind en jou teruglei, want Hy het reeds Sy lewe vir jou afgelê.