Undercover boss

Kollosense 3 : 22 Wat julle ook al doen, doen dit van harte soos vir die Here en nie vir mense nie,

Ek kyk onlangs vir die eerste keer die program “Undercover boss”.  Die Uitvoerende Hoofde van groot maatskappye vermom hulself en werk dan in verskeie afdelings van hul besigheid.  Om die teenwoordigheid van kameras te verduidelik word die personeel vertel dat die persoon deel van ‘n dokumentêr is.  Dis eintlik ‘n briljante manier om te sien presies wat in jou besigheid aangaan.

So byvoorbeeld ry die Uitvoerende Hoof saam met ‘n drywer om pakke klere by verskeie takke te gaan aflewer.  Hy sien hoe dit nie moontlik is om die roete in die aangewese tyd te voltooi nie.  Boonop breek die trollies waarmee hy die pakke straat af stoot, die reëlings in die vragmotor val op die grond met al die pakke en die arme drywer spandeer 15 minute om papierwerk af te handel voor hy na die volgende winkel kan vertrek.

Na ‘n week laat hy elke werknemer met wie hy nou saamgewerk het na sy kantoor kom en ontmasker homself aan hul.  Jy kan jou voorstel hoe senuweeagtig die werknemers is, want meeste maak baie negatiewe opmerkings in sy teenwoordigheid. 

Na die ontmaskering spreek hy hul individueel.  Vir die een outjie vra hy of hy weet hoe seer sy kritiek vir hom as eienaar gemaak het.  Die outjie skuif op sy stoel rond en vra omverskoning… en sê dat dit maar net sy opinie was.  Jy kan jou die outjie se verligting voorstel as die Uitvoerende Hoof dan breed glimlag en sê:  “Nee!  Jy was reg.  Ek waardeer elke eerlike opmerking van jou, want ek weet jy het dit gesê omdat jy omgee. Terloops, hy was so beindruk met hierdie jongman dat hy vir hom ‘n Internskap aangebied het.

Vir elkeen van die werknemers word daar dankie gesê omdat hul goeie idees gehad het en tekortkominge uitgewys het.  Verbeterings wat hul voorstelle insluit word aan hul oorgedra.  Meesal word die werknemers dan genooi om deel van die verbeterings te wees. Een vrou is byvoorbeeld saamgenooi na Italië om deel te wees van die ontwikkeling van nuwe produkte.  Sommige kry bevordering en ander verhogings.  Jy kom ook agter dat die Uitvoerende Hoofde goed luister na die werknemers, want hy tel byvoorbeeld op dat die persoon graag sy studies wil voltooi en dan bied hy aan om daarvoor te betaal of ‘n man wat graag wil trou, maar daar is nie geld nie se bruilof word volledig geborg.

Wat my opval van die reeks, is hoe belangrik erkenning is.  Dit is ook opmerklik dat mense negatief is as gevolg van omstandighede.  Sodra daardie omstandighede verbeter is hul ontsettend positief en toegewyd.

Niemand van ons weet wanneer ons grootbaas dalk ‘undercover’ by ons werkplek inval nie.  As hy met jou praat… watter indruk sal hy van jou kry?  Sal hy jou bevorder, beloon, prys?

Die feit dat daar iemand is wat ons salaris betaal, maak van hul ons ‘baas’, maar uiteindelik werk ons vir God.  Sal dit nou nie lekker wees as Hy aan die einde van die dag tevrede met ons dagtaak kan wees nie?

Leef doelbewus

Jeremia 1 : 5  Voordat Ek jou in die moederskoot gevorm het, het Ek jou geken; voordat jy gebore is, het Ek jou aan My gewy en jou as profeet vir die nasies aangestel.

God se plan met jou lewe het al lankal begin.  Terwyl Hy jou daar in die moederskoot gevorm het, het Hy alreeds geweet wat die doel van jou lewe is.  Jy is doelbewus geskep, nie per toeval nie en ook nie per ongeluk nie.

Daarom moet ek en jy elke dag probeer om die persoon te wees wat God bedoel het ons moet wees.  Vra na Sy wil.  Vra om leiding. Luister na Sy stem en weet dat jy op pad is na 'n eindebestemming, maar dat dit veral die reis is wat haarfyn beplan is.  

Daar gaan langs die pad opwindende dinge gebeur.  Mense gaan jou pad kruis en vir jou deure oopmaak en jy gaan geleenthede kry waarvan jy nie eens kan droom nie.

Leef doelbewus,nie in onsekerheid nie. Leef asof jy bedoel is om hier te wees en soos iemand wat weet wie jy is.  Leef voluit!

Die regte pad

Psalm 23 : 3 Hy lei my op die regte paaie tot die eer van sy Naam.

Om vandag die regte paadjie te loop, is nie maklik nie.  Versoekings skuil om elke draai.  

Kyk jy TV, hoor jy kort-kort:  "Oh, my God!"  Partykeer wonder ek of hulle ooit weet wat hul sê.  Weet hul dat dit die een sonde is wat onvergeeflik is.  Jy mag die Naam van die Here jou God nie ydelik gebruik nie, want die Here sal die een wat Sy naam ydelik gebruik, nie ongestraf laat bly nie.  Ek wil elke keer uitgil... pasop!  Trek jou woorde terug!  Moenie!

Die huwelik word nie meer eerbiedig nie. Om aan 'n huwelik te werk is onnodig, ons skei eenvoudig en trou weer.  Of wat van sommer net 'n man/vrou op 'appro' neem... 

Kleredrag raak al skrapser en nudistestrande word bepleit.  Die liggaam is lankal nie meer 'n tempel van God nie.  Aag en gooi maar 'n dwelmpie of twee ook in, dis al manier om te 'cope'.

Om te neem wat nie aan jou behoort nie, is jou reg.  Die feit dat iemand anders daarvoor gewerk het, is irrelevant.

Juis daarom moet ons elke dag bid dat God ons op die regte paaie sal lei... paaie wat tot eer van Sy Naam sal strek.  Weerhou ons van die kwaad en verlos ons van die bose.

I'm possible

Jeremia 32 : 27  Ek is die Here die God van al die mense. Is iets vir My onmoontlik?

Niks is vir God onmoontlik nie.  Hy kan enige iets doen. 

Dalk dink jy ja wel, miskien kan Hy enige iets doen, maar dit geld nie vir my en my probleem nie.  Lees dan weer die teks.  Hy is nie net God vir gelowiges nie... Hy is nie net God vir die dominee nie... Hy is God van AL die mense.  Dit is dus nie net 'n elite groepie mense wie se geloof ontsettend sterk is vir wie Hy help nie... nee, Hy is daar vir almal.

Dis soos om 'n advertensie te plaas wat sê:  "Almal wat hier lees kan vir hulle 'n geskenk kom haal."  Hoeveel mense dink jy gaan dink dit is te goed om waar te wees, so hul gaan dit liewer ignoreer.  Ander gaan weer glo, ja vir almal behalwe vir my.  Daar gaan tog 'n groepie wees wat dink, dis 'n bargain, kom ons kyk wat dit is.

Ek hoop jy val onder laasgenoemde groepie, want ek wil graag hê dat jy kom kyk wat God vir jou kan doen.  Hy bied ook 'n geskenk vir enige iemand wat dit wil kom kry - die Ewige Lewe.

Die Engelse woord Impossible, is so oulik, want ons kan dit lees as I'm possible.  God het homself voorgestel as "Ek is".  I am... possible!  Ek dink die woordjie 'onmoontlik' bestaannie  in God se woordeskat nie.  Gaan lees maar Die Bybel... Sara wat kinders kry lank nadat sy haar vrugbaarheid agtergelaat het... Daniël wat in 'n vuuroond beland en nie eens na rook ruik nie... Dawid wat vir Goliat met een hou doodgooi... Jesus wat uit 'n maagd gebore word 

Jy't nou lank genoeg hier vasgehaak

Deuteronomium 1 : 6  “Die Here ons God het by Horeb vir ons gesê: ‘Julle het nou lank genoeg by hierdie berg gebly.

Party mense kan hulself nie help nie... hul bly eenvoudig vashaak by die verlede.  Nie net word die ou koeie uit die sloot gegrawe nie, hulle word sommer uitgestal sodat hulle elke dag afgestof kan word.

Vandag gaan ook eendag die verlede wees.  Ons weet dat die koerante en nuus vol van slegte dinge is wat vandag gebeur dus gaan vandag nie 'n perfekte dag in die verlede wees nie... so ook die tye waaroor jy so nostalgies raak.  Daar was ook maar slegte dinge wat gebeur het en deel daarvan was.  Ons kies om die slegte te ignoreer en romantiseer die verlede.  

Jy kan die verlede nie terugkry nie, maar jy kan vandag ten volle geniet en ervaar om lieflike herinneringe agter te laat as jy die verlede laat waar dit hoort... in die verlede.  Elke dag is 'n juweeltjie om te geniet, so hoekom wil jy jouself met die verlede besig hou?

Wat jou ookal terughou, maak los en laat gaan.  Die tyd het aangebreek.  Jy kan nie dit terugkry waarna jy hunker en verlang nie, maar jy kan absoluut beautiful nuwe memories skep.

God verwag van jou om aan te beweeg.  In vers 8 motiveer hy die volk deur hul te vertel van hierdie wonderlike nuwe land wat Hy tot hul beskikking gaan stel.  

So dikwels verloor ons die kans op geluk omdat ons nie wil aanbeweeg nie.  Daar wag iets veel beter op jou.  

Dis geloof

Hebreërs 11 : 1  Om te glo, is om seker te wees van die dinge wat ons hoop, om oortuig te wees van die dinge wat ons nie sien nie.

Dis maklik om te glo daar is sewe dae in 'n week, want ons kan dit op die almanak sien.  Dis moeiliker om te glo dat God binne die volgende drie dae jou gebede gaan beantwoord.  Hoekom?

Ons glo die almanak, maar ons glo nie Die Bybel nie?  'n Almanak is bloot die mens se manier om van dae tred te hou.  Die Bybel is oor eeue heen ook deur mense saamgestel wat deel van die gebeure was.  Dis asof dit 'n dagboek wat dit 'n historiese kalender maak.  

Oor eeue heen het verskillende mense hul memoirs neergepen en wanneer jy byvoorbeeld die boeke van Matteus, Lukas en Johannes lees, kan jy die ooreenkomste in die vertelling sien.  Niemand herhaal tog 'n hoofstuk in 'n boek nie, maar God wou seker maak daar is geen twyfel nie en daarom is verskeie mense se weergawes, ook van wonderwerke wat hul aanskou het in sy Woord saamgevat.

Dis amper asof jy nie hoef te sien om te glo nie, jy weet eenvoudig. Ek weet dat ek weet wat ek weet omdat ek weet.

Glo... glo...glo

Romeine 4 : 18  Toe daar geen hoop meer was nie, het Abraham nog gehoop en geglo, en so die vader van baie nasies geword volgens die belofte: “So sal jou nageslag wees.”

Hoe dikwels bid ons en hoop dat God ons gebede sal beantwoord en dan gebeur daar niks nie.  Ons verwag dat God elke gebed sal beantwoord, maar ons is nie bereid om aan te hou glo tot Hy antwoord nie.  

Al die 'odds' was teen Abraham.  Nie net was hy self al 'n gevorderde ouderdom nie, maar ook sy vrou, Sara, was alreeds verby haar vrugbare jare. Die kanse dat hy 'n eie kind by Sara sou hê, was medies gesproke min of meer nul in die tyd dat hul geleef het.  Vir kunsmatige inseminasie of surrogaat ouerskap sou Abraham nog min of meer 2000 jaar moes wag.  Geen wonder Sara kon die 'giggles' nie keer nie toe sy hoor dat sy sou swanger word nie.

Dis maar een van vele bewyse in Die Bybel waar God die onmoontlike moontlik maak.  God se belofte het gerealiseer en ek kan my nie eens die vreugde van hierdie ouerpaar voorstel nie.  

Jou geloof wankel dalk ook vandag, maar weet gerus dat God ook in jou lewe die onmoontlike kan laat gebeur.  Wanneer jy wil ophou glo, bid dat God jou geloof sal versterk en druk deur.

Moenie bang wees nie

Jesaja 49 : 10  Moenie bang wees nie, Ek is by jou, moenie bekommerd wees nie, Ek is jou God. Ek versterk jou, Ek help jou, Ek hou jou vas, met my eie hand red Ek jou.

Hierdie is nie 'n vers wat jy nog nooit gelees het nie, maar een wat jy vandag baie nodig het.  Hoekom jy bang of bekommerd is, dit weet net jy en God en daarom kom hierdie vers vandag na jou.  Hoe weet God juis vandag dat jy Hom nodig het?  Hy weet dit omdat Hy by jou is in hierdie oomblik van nood.  

Niks sal gebeur nie, want Hy is daar en Hy is nie passief nie.  Hy gee jou krag, help jou, hou jou vas en as dit nodig is, spring Hy in en red jou.  

Die lewe is vol bekommernisse en gevare, dit weet ons maar te goed.  In die normale verloop van die lewe het jy God dus nodig, meer as ooit tevore. 

Iemand kan daar wees vir jou elke dag, maar wat regtig saak maak, is as die persoon daar is as jy hom of haar nodig het.  Dit is presies wie God is.  Hy is nie 'n mooiweersvriend wat net daar is vir jou wanneer jy Hom in elk geval nie nodig het nie (met respek gesê) / wanneer dit goed gaan... nee, Hy is in alle omstandighede daar.

Jy kan hierdie dag met nuwe moed tegemoet gaan, wel wetend dat God almagtig jou beskerm.

Die verbond

Jesaja 59 : 21  Wat My betref, sê die Here, dit is my verbond met die volk: my Gees wat op jou is en my woorde wat Ek in jou mond lê, sal nie uit jou mond en uit die mond van jou kinders en jou kindskinders verdwyn nie, sê die Here, nie nou nie en nooit nie.

Daarom is ons nie bang nie

Psalm 46 : 2 - 3  God is vir ons 'n toevlug en 'n beskerming; Hy was nog altyd bereid om te help in nood.  Daarom is ons nie bang nie, al gee die aarde pad, al skuif die berge tot in die dieptes van die see,

Moenie opgee nie

Matteus 7 : 7  “Vra, en vir julle sal gegee word; soek, en julle sal kry; klop, en vir julle sal oopgemaak word

Vra maar

Johannes 15 : 7 As julle in My bly en my woorde in julle, vra dan net wat julle wil hê, en julle sal dit kry.

Jy mag maar die lewe geniet

Prediker 5 : 17 - 18  Ek het ook iets gesien wat goed is: dit is aangenaam om te eet en te drink en die lewe te geniet onder al die geswoeg op hierdie wêreld. Dit kom 'n mens toe vir die hele leeftyd wat God hom skenk.  God gee aan 'n mens rykdom en besittings en laat hom dit geniet. God laat die mens sy deel ontvang en sy werk met vreugde doen. Dit is 'n gawe van God.

Ek is veilig

Psalm 27 : 6  Op die dag van gevaar sal die Here my wegsteek in sy huis, my veilig laat skuil in sy woonplek, my hoog op 'n rots laat staan

Bevry my uit die vangnet

Psalm 31 : 5  Bevry my uit die vangnet wat hulle vir my gestel het, want U is my toevlug.

Om apostel te wees

Romeine 1 : 5  Deur Hom het ek die genade ontvang om apostel te wees onder al die heidennasies, om tot eer van sy Naam mense tot geloof en so tot gehoorsaamheid te bring.

Gooi af en hardloop

Hebreërs 12 : 1 - 2  Terwyl ons dan so 'n groot skare geloofsgetuies rondom ons het, laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop,die oog gevestig op Jesus, die Begin en Voleinder van die geloof. Ter wille van die vreugde wat vir Hom in die vooruitsig was, het Hy die kruis verduur sonder om vir die skande daarvan terug te deins, en Hy sit nou aan die regterkant van die troon van God.

Wat verwag God van my hierdie jaar?

1 Tessalonisense 5 : 16 - 18  Wees altyd bly.  Bid gedurig.  Wees in alle omstandighede dankbaar, want dit is wat God in Christus Jesus van julle verwag.