Koningskind

Matteus 6 : 9  Ons Vader wat in die hemel is…

Wanneer jy glo dat jy ‘n kind van God is, is jy onafskeidbaar aan Hom gebind.  Leon Goosen sing, ook dat jou Pa die koning is en daarom is jy ‘n prins/prinses. 

Jy woon dalk in ‘n plakkerskamp of in ‘n nederige huisie in 'n minder gegoede buurt.   Daar was nie geld om verder te leer nie en dalk het jy nooit eens skool klaargemaak nie.  Jy dra nie bekende handelsmerk klere nie.  Jy maak van publieke vervoer gebruik omdat jy nie jou eie vervoer het nie en woon by iemand in die agterplaas omdat jy nie ‘n eie blyplek kan bekostig nie. 

Jy ag jouself as arm.  Volgens finansiële standaarde is jy seker arm, maar nie op geestelike gebied nie, nie as jy Sy kind is nie.  God meet nie jou rykdom aan aardse besittings nie.  By Hom is jy ‘n Koningskind, besit jy alles wat nodig is om die Ewige Lewe te mag beërwe.  

Lig jou kop koningskind en kyk op na jou Vader in die Hemel - Hy is onuitspreeklik lief vir jou.