God jok nie

Numeri 23 : 19  God is nie 'n mens dat Hy sou lieg nie, 'n mens dat Hy van gedagte sou verander nie. Sou Hy iets sê en dit nie doen nie, iets belowe en dit nie uitvoer nie?

Moes jy ook al uitvind dat iemand van wie jy dit nooit verwag het nie, vir jou gejok het?  Dis niks lekker nie en dit ontstel jou.  En tog gebeur dit daagliks.  Deesdae kan jy niemand meer vertrou nie, want kort voor lank word jy teleurgestel wanneer die waarheid ontbloot word.

Dalk bak jy ook soms kluitjies.  Ons het mos die manier om dinge te regverdig deur te sê dat ons dit doen omdat ons iemand seerkry wil spaar.  Party reken dis net ‘n ou wit leuntjie wat niemand kan seermaak nie. 

Dis hoekom dit vir my so verfrissend is om swart op wit in die Bybel te lees:  “God jok nie.”  Sy Woord is Sy eer. 

Dis nou op hierdie punt dat ek jou wil herinner aan al God se beloftes in die Bybel.  Niemand hoef een oomblik te twyfel aan hierdie beloftes nie, want Numeri 23 maak dit duideliker as daglig.  God jok nie; Hy sal jou nie onder ‘n vals indruk bring of mislei nie.  Sy beloftes is ‘real’.