Dankie Here

Dankie Here, 'n geestelike lied gesing deur Natasha Joubert

Elke ding wat ons van die lewe kan begeer, kom van die Here.  Dankie Here, vir ‘n wysie en ‘n woord..., dankie Here vir die vreugde wat dit bring, mag elke noot wat mense hoor, hulle hart en siel bekoor, laat die eer aan U behoort...

Alhoewel dit dikwels die wysie is wat ons aandag trek, kan daar groot inspirasie geput word uit die lirieke.  So word daar met elke geestelike lied ‘n boodskap van bemoediging uitgedra.  Dis ook verblydend om te sien wanneer ‘n sanger nie net erkenning aan God gee vir die woorde en musiek nie, maar ook sy/haar afhanklikheid van Hom besef. 

Natasha besef deeglik die krag wat daar in ‘n liedjie opgesluit is en sy hoop dat mense daardeur geraak sal word, maar meer nog, dat alle eer aan Hom behoort wat haar die talent gegee het.  Met hierdie lied word jy aan die wonder daarvan herinner, en ook dat elke ding wat jy begeer, uit Sy hande kom. Prediker 2 : 24 Dit is nie aan die mens self te danke dat hy kan eet en drink en onder al sy arbeid nog die goeie kan geniet nie. Ek het ingesien dat dit 'n gawe uit die hand van God is.