Wanneer jy daar op ‘n hopie sit en jou hart uitsnik en dink niemand verstaan waardeur jy op hierdie oomblik gaan nie; niemand het nog ooit so seer gehad soos jy op hierdie oomblik nie, is dit moeilik om God se nabyheid te ervaar, want jy kan nie sien hoe jy hierdeur gaan kom nie.
Dit is alles menslike gevoelens en dit is hoe God ons gemaak het. Laat hierdie emosies toe om hul uit te woed, maar voel ook die Here se arms om jou. Deuteronomium 33 : 27 Die ewige God is 'n skuilplek, sy arms is altyd onder jou. Hy voel saam met jou.
God gil of skree nooit nie. Hy fluister en partykeer moet jy mooi luister, want Hy fluister wanneer jy dit die minste verwag. Hou aan bid. Lees jou Bybel. Werk aan jou verhouding met Hom en jy sal Sy stem hoor. Jy sal Sy krag ervaar om aan te gaan en dit te verwerk wat jy nooit gedink het jy in staat sal wees om te verwerk nie.
Jy gaan selfs eendag ‘n punt bereik om terug te kyk en die positiewe uitwerking te sien wat hierdie ervaring op jou menswees gehad het.
No comments:
Post a Comment