Wat is jou planne?

Matteus 5:3

"Geseend is die wat weet hoe afhanklik hulle van God is, want aan hulle behoort die Koningkryk van die hemel..."

Wanneer die einde van die jaar so naby is, het meeste van ons seker al vakansieplanne.  Sommige beplan ook seker al aan volgende jaar  se studie rigtings.  Dalk is daar ‘n troue op pad, of dalk gaan jul met ‘n gesin begin – alles verg haarfyn beplanning.

Ons weet dat niemand beplan om te faal nie, maar dat mense faal omdat hul nie beplan nie, so oordeelkundige beplanning is noodsaaklik.  Jy moet mikpunte en doelwitte hê.  Dis ook goed so, maar ek wonder tog hoeveel van ons ook die Ewige Lewe in ons beplanning  inwerk.  Beplan jy wat jy moet doen, wat jy moet vermy en hoe jy struikelblokke tot by die Ewige Lewe gaan oorkom?  Doen jy genoeg navorsing (Bybelstudie)?  Hou jy introspeksie na elke dag om te sien of jy nog binne jou beplanning is?  Dalk het jy bietjie van koers af gedwaal en moet jy herbeplan.  Ons google vakansiebestemmings en ons doen navorsing oor studierigtings, dink net hoe fantasties dit sal wees as ons net so ywerig navorsing doen oor God se Woord! 

Al het jy 10 grade… al het jy die hoogste sport op die suksesleer bereik… al is jy die rykste mens in die wêreld… die dag dat jy sterf, word die syfertjies almal na nul teruggedraai… ewe skielik is die kwalifiserings kriteria heeltemal anders as wat jy tot op daardie oomblik gewoond was.

"Ek glo in vandag...  Dit is die enigste ding wat ek besit...  Die verlede is kosbaar vir soverre dit vandag voller en vryer kan maak...  Daar is geen versekering dat more sal kom nie...  Ek moet die beste van vandag maak! ¬ Charles Stelze