Dit werk! - Deur R H Jarrett (1926)

Filippense 4:6  Moet oor niks besorg wees nie, maar maak in alles julle begeertes deur gebed en smeking en met danksegging aan God bekend

Jy beskik oor ‘n uitsonderlike mag… een wat binne jou skuil en wat jy tot nou toe nie ten volle ontgin het nie.  R H Jarrett noem dit “Emmanuel” (God met/in ons).  Dit stel jou in staat om jou wildste drome te bewaarheid. 

Maak jou dus gereed vir ‘n omwenteling.  In stede daarvan dat jy slegs jou wense uitspreek, kan jy dit realiseer.  Tot nou toe het jy dalk net gesê:  “Dit sal darem lekker wees om ook Mauritius toe te gaan.”  Van nou af, gaan jy drie eenvoudige reëls volg en voor jy jou kom kry sit jy in Mauritius… en dis maar net een voorbeeld.

R H Jarret se 3 Positiewe Reëls vir Sukses:

1.            Stel ‘n lysie saam, maar wees spesifiek.   Byvoorbeeld as jy ‘n motor wil hê, watter fabrikaat moet dit wees? Kleur? Prys? Teen watter datum verwag jy dit?  As jy sukses vir jou besigheid verlang, praat syfers.  Dit mag laf voorkom, maar jy kan nie verwag dat jou drome realiseer as jy nie spesifiek is nie.  As jy nie kan besluit nie, is dit nie gereed vir jou lysie nie;

2.            Lees die lysie ten minste drie maal per dag:  soggens, smiddae en saans

3.            Dink soveel as moontlik daaraan

Nou begin jy om met God hieroor te gesels op ‘n daaglikse basis, om jou geloof te versterk.  Aan die begin kan sommige van die items op jou lysie onhaalbaar voorkom, maar skryf hul nietemin neer en hou aan met die proses.  Wanneer nog gedagtes by jou opkom oor iets wat jy graag wil sien gebeur, of items begin afhaal soos hul realiseer, begin die metode beslis werk.

Natuurlik gaan jy met tye skeptiese wees en gedagtes van twyfel jou te binne skiet… haal jou lysie uit en lees dit… oor en oor.  As jy dit gememoriseer het… herhaal dit soos ‘n mantra totdat die twyfel wyk.  Dit help ook om negatiewe mense te vermy.  En… onthou die teksgedeelte hierbo.  As jy radio wil luister, moet jy die radio instel en seker maak hy is op die regte frekwensie.  Net so sal jy moet oefen om jouself in te stel op God se Voorsienigheid.

Moenie in die strik trap dat jy dit as toeval afmaak wanneer jou drome begin realiseer nie.  Wees voorbereid om verras te word… moet dit nie eens probeer verstaan nie… aanvaar dit net  en bedank God onmiddellik, met jou hele hart en siel, vir Sy Bonatuurlike voorsiening en gee vir Hom die krediet daarvoor.  Aanvaar dit met grasie en dankbaarheid.  Sodoende bevestig jy jou onwrikbare vertroue in Hom.

Onthou dat jy gaan ontvang waarmee jy jou gedagtes besig hou… as dit gedagtes van negatiwiteit is, is dit wat oor jou gaan kom.. en net so met positiewe gedagtes.

Om ‘n CD te bestel of ‘n dagstukkie in MP3 formaat af te laai, besoek gerus die webblad: www.watsediewoord.co.za