Besef wie jy is

1 Korintiërs 12 : 17 – 18  As die hele liggaam oog was, hoe sou hy kon hoor? En as die hele liggaam oor was, hoe sou hy kon ruik?  Maar nou het God die lede, elkeen van hulle afsonderlik, in die liggaam gevoeg soos Hy dit wou hê.

Op ‘n stadium is Johannes besig om mense te doop. Hulle vra vir hom of hy die Christus is.  Johannes hoef nie twee keer te dink nie.  “Nee, ek is nie die Christus nie.”

Dis duidelik dat Johannes geweet het wie hy was, maar meer as dit… hy het ook geweet wie hy nie was nie.  Sy werk was om die pad voor te berei vir Jesus.  Hy was nie Jesus nie. 

Jy sien, dit is net so belangrik om te weet wie jy nie is nie, anders word jy ingetrek by dinge waar jy dalk belangrik mag voel, maar beslis nie waarde sal toevoeg nie.  Jy het dalk 'n belangrike pos, maar dit is nie waar God jou sien nie.  

Ons het almal beperkings en as ons nie weet wat ons beperkings is nie, sal ons nooit ons natuurlike gawes ten beste kan aanwend nie.  Jy sal ook nie jou roeping kan verwesenlik nie.

Soos elke deel van die liggaam sy eie funksie het, so het elkeen van ons ook ‘n spesifieke doel in God se koninkryk.  Hy wil ons plant waar ons op ons beste kan blom.

Wanneer jy egter op plekke is waar jy nie veronderstel is om te wees nie, of tussen mense waar jy nie bedoel is om te wees nie, sal jy altyd minderwaardig en onvergenoegd voel.  Dit sal ‘n stryd wees om jou beste te lewer.  Dit hoef nie jou lot te wees nie.

Besef wie jy is en hardloop jou eie resies.  Atlete bly binne hul bane vir ‘n rede.