Eensgesindheid

Psalm 133 : 1  Hoe goed, hoe mooi is dit as broers eensgesind saam woon!

Eensgesindheid in ons land is seker my grootste droom / wens.  Ek droom van ‘n leier wat ons gaan verenig en nie verdeel nie.  Ons is so ingestel op mekaar se verskille dat ons nie eens agterkom hoeveel ooreenkomste daar is nie.

Die oomblik wanneer jy iemand op ‘n dieper vlak leer ken, besef jy dat ons eintlik almal dieselfde is.  Daar is basiese behoeftes wat ons almal het. 

Ek glo dat satan besig is met ‘n uitstekende strategie.  Hy weet baie goed dat hy ons moet verdeel om te oorwin.  Hy ken die krag, sinergie en seëninge wat daar in eensgesindheid te vinde is en daarom blaas hy ‘n smeulende kooltjie aan.  Diegene wat hulself so laat gebruik deur satan, besef nie eens dat hul gebruik word nie. 

Een van 7 dinge wat God haat, volgens Spreuke 6, is mense wat rusie veroorsaak tussen broers.  Daarenteen sê Paulus in Efesiërs 4 : 3 Lê julle daarop toe om die eenheid wat die Gees tussen julle gesmee het, te handhaaf deur in vrede met mekaar te lewe.

Ons moet satan nie onderskat nie.  Hy besef goed dat ons al baie van sy ‘tricks’ agtergekom het, so nou begin hy vuilspeel.  Hy sweep ons teen mekaar op en sit dan lekker agteroor en kyk hoe ons mekaar vernietig.  Dis hoekom oorloë oor die eeue heen ontstaan het en derduisende onskuldiges hul lewens verloor het.  Hy gaan veroorsaak dat jy jouself oor ‘n eenvoudige opmerking vererg of dalk net hoor wat jy wou hoor en dit dan uit verband ruk en jouself sodoende in die moeilikheid kry deur ‘n debat op sosiale media. 

Bid egter en vra God om die waarheid in elke situasie aan jou te openbaar.  Christus is die ware Vredemaker onder ons.  Wanneer ons op Hom vertrou, sal Hy ons veilig deur die storm lei na kalm waters.

Saam met Paulus pleit ek:  Ek doen 'n beroep op julle almal, broers, in die Naam van ons Here Jesus Christus, om eensgesind te wees. Daar moet geen verdeeldheid onder julle wees nie. Julle moet een wees in dieselfde gesindheid en met dieselfde oortuiging. 1 Korintiërs 1 : 10)

Dis maklik om te verskil en moeilikheid te veroorsaak… dit neem eintlik baie min, selfs ‘n leuen, maar om mense saam te snoer verg veel meer.   Kom ons neem die moeiliker roete, want op die ou end is dit nie net die moeite werd nie, dit kan lewens spaar.