As Hy weer kom...

Kolossense 3 : 4  Wanneer Christus, wat julle lewe is, by sy wederkoms verskyn, sal julle ook saam met Hom verskyn en in sy heerlikheid deel.

Die ou Hallelujah liedjie, "As Hy weer kom", weerklink dalk ook steeds in jou geheue.  Dit is hoe menige kind van die Wederkoms geleer het.  God kom eendag om sy pêrels te haal:  “al die skones, al die wittes vir Jesus se kroon”. 

Met hierdie eenvoudige liedjie is ‘n saadjie gesaai.  Dalk was dit toe reeds jou begeerte om eendag een van daardie pêrels te wees wat Hy kom haal.  Is jy steeds daarvan seker dat jy eendag Hemel toe gaan?   Sien jy steeds met afwagting daarna uit?  Leef jy met die wete dat jy jouself vir die hiernamaals voorberei?  Of het jy afgedwaal? 

Leef en tree elke dag so op dat jy verseker daarvan kan wees dat jy wel Hemel toe gaan.  Daar is geen waarborg nie, maar daar is sekere vereistes.  Jy moet wedergebore wees.  Jou hart moet aan Hom behoort.  Jy moet ‘n kind van God wees.

As Hy weer kom, as Hy weer kom, kom haal Hy Sy pêrels, al die skones, al die wittes, vir Jesus se kroon...