Amos 4 : 9 (1953
Vertaling)… baie van julle tuine en julle wingerde en julle vyebome en julle
olyfbome het die sprinkaan verslind — nogtans het julle jul tot My nie bekeer
nie, spreek die HERE.
Wanneer jy na die wêreld
kyk, besef jy dat dit allermins goed gaan.
In vele lande woed oorlug en onrus… ook in ons eie land is die pot besig
om al meer te borrel, en baie wonder wanneer hy gaan oorkook.
Politiek bestaan nie meer
uit debatvoering nie, maar uit hofsake en dreunsang. Respek is slegs in ‘n woordeboek te
vinde. Rondom ons gaan die omgewing en
infrastruktuur agteruit en om alles te kroon, moet ons meer betaal vir
minder. As verbruiker is ons al
skokbestand. Ons glimlag en skud ons kop,
maar die lewe moet voortgaan.
Die ‘sprinkane’ is besig om
alles rondom ons te verslind… hoekom?
Volgens statistiek is die grootste deel van ons bevolking Christene,
maar ek sien nie veel kenmerke van Christenskap in my mede-landsgenote se doen
en late nie. Dis amper ‘n
oorlewingsstryd. Almal trap op mekaar om
hulself te bevoordeel. Goeie dade of
goeie maniere is skaars.
Ons kan nie wag dat ‘hulle’
verander nie. Realiteit is dat
verandering by elkeen van ons begin. As
jy papiere sien rondlê, tel dit op. As
jy iemand sien met ‘n behoefte, reik ‘n hand van vriendskap na hom/haar
uit. Bekering is nie ‘n eenmalige daad
en net iets tussen jou en God nie, deel daarvan is om dit uit te leef in woord
en daad. As volk is dit tyd om ons daadwerklik
te bekeer, voor die sprinkane alles verwoes het. Gaan jy die eerste tree gee?
Besoek gerus die webblad: www.watsediewoord.co.za
No comments:
Post a Comment