Galasiërs 6:2 Dra
mekaar se laste, en gee op dié manier uitvoering aan die wet van Christus.
Elkeen van ons het seker al
‘n oomblik beleef waar ons, ons maskers opgehad het. Dink maar aan ‘n dag waar jy bietjie siek
voel en iemand vra hoe dit gaan.
Partykeer antwoord ons maar net beleef, “goed dankie,” maar ons is ver
van goed-voel af.
Miskien ervaar jy vandag een van daardie maskertye… Of jy nou ‘n liefdesteleurstelling gehad het, of
ongelukkig is in jou werk… of jy nou vanoggend jou humeur verloor het met jou
man of kinders… of jy dalk iewers op pad werk toe ontstel is… of dalk is jy
bekommerd oor jou eie of ‘n familielid se gesondheid…
Hoe dit ook al sy, soms is
dit goed om eerlik te wees wanneer iemand jou vra hoe dit gaan; om sommer net
jou masker te laat sak en te sê: “Weet jy, dit gaan glad nie goed met my vandag
nie.” Jy hoef nie altyd al die
persoonlike besonderhede te deel nie, maar jy sal dalk verras wees deur iemand
na aan jou se deernis.
Ons is so bang om onsself
as ‘mens’ bloot te stel. Glo my alle mense
kry swaar of seer. Mense beleef almal
een of ander tyd eina tye. Jy hoef nie
altyd voor te gee dat alles wel is nie. Robin
Williams was iemand wat ander laat lag het, tog het hy soveel hartseer binne
hom rondgedra.
Gedeelde hartseer word
gehalfeer, gedeelde vreugde verdubbel. Dra mekaar… deur die goeie, sowel as die
moeilike tye.
Besoek gerus die webblad: www.watsediewoord.co.za
No comments:
Post a Comment