Vergifnis

Levitikus 5:5  Wanneer hy in enige van dié gevalle te wete kom dat hy skuldig geword het, bely hy dat hy gesondig het

Word jy gekniehalter deur skuldgevoelens?  Dit kan wees dat jy voel dit wat jy gedoen het, is onvergeeflik en soms kan jy selfs voel asof jy jouself nie eens kan vergewe nie.

Daardie gevoelens kan jou verewig weerhou om die lewe in sy volheid te ervaar.  Om te weet jy’t verkeerd gedoen, is een ding.  Om ware berou te hê en te weet, met ‘n diepe sekerheid, dat God jou vergeef het, is ‘n ander ding, maar dit is moontlik.  Jy hoef nie vir altyd te boet vir een verkeerde daad nie.

Die feit dat jy nog steeds daaraan dink en dit knaend herkou, beteken dat jy nog nie Sy vergifnis aanvaar het nie. Wanneer jy ware berou het nadat jy God daarvoor gevra het, dan is ware vryheid joune.  Dit is omdat God nie kwaad teen jou sal hou of ou koeie uit die sloot sal uitgrawe as Hy jou eers vergewe het nie.  Die aanhoudende skuldgevoelens is die sak wat jy nie wil laat los nie. Hoekom moet jy vasklou aan dit wat God al lankal vergeet het?  Aanvaar Sy genade met grasie.

Dis iets wat ons by God kan leer.  As ons iemand vergeef, moet ons dit vir altyd uitwis, want dit is wat ware vergifnis beteken.

Om ‘n CD te bestel of ‘n dagstukkie in MP3 formaat af te laai, besoek gerus die webblad: www.watsediewoord.co.za