Jou beloofde land

Josua 23 : 5  Die Here julle God sal hulle wegstoot voor julle en hulle voor julle uit verdrywe sodat julle hulle land in besit kan neem soos die Here julle God julle beloof het.

Almal van ons het hindernisse of reuse in ons lewens wat verhoed dat ons, ons ‘beloofde land’ betree.   Meeste van tyd bestaan hul slegs in ons gedagtes, maar ons blaas hul op deur aanhoudend daaroor te tob.  Eintlik het ons net twee keuses, ons kan ‘n slagoffer van hierdie gedagtes word, of ons kan besluit om eenvoudig te besluit dat ons onsself nie gaan laat intimideer deur hulle nie, maar eerder daadwerklik daarteen baklei.  Wyk satan!

Volgens die Bybel het die kinders van Israel kamp opgeslaan binne stapafstand van die Beloofde Land.  God het hul alreeds verseker dat dit aan hul behoort.  Al wat hul moes doen, was om dit binne te gaan; daarvoor te veg.  Maar toe die 12 verspieders terugkom en vertel hoe groot die opponente is, het hul, in hul gedagtes, alreeds die geveg verloor.  Dit was ondenkbaar om te wen as jou opponente groter en sterker as jy is en daarom het hul verskonings begin uitdink soos...  die Kanaaniete is te groot… of te veel… hulle gaan ons doodmaak… ons het nie ‘n kans nie… Hul denke was hul grootste struikelblok; die rede waarom hul gebly het waar hul is en nie dit wat vir hul gewag het, gaan opeis het nie.  So is hul afgetrek tot op ‘n punt waar hul verslaan was nog voor die geveg begin het. 

Liewe vriend(in), sien jy dalk jouself in die prentjie?   Die ‘geveg’ wat jy vandag moet veg, is in jou kop.  Verander jou denke sodat jy God se beloftes kan opneem.  Dink eerder gedagtes van oorwinning, positiewe gedagtes, wat jou situasie omkeer.  Verklaar dat jy ‘n oorwinnaar is, lank voor jy die arena betree.  Terwyl jy hierdie stryd in jou kop omdraai, sal jy sien hoe die situasie verander en hoe jy jou ‘beloofde land’ betree.