Definieer jou drome

Matteus 7:8  want elkeen wat vra, ontvang; en elkeen wat soek, kry; en vir elkeen wat klop, sal oopgemaak word.

Mark Twain het gesê:  “Die wêreld skuld jou niks; dit was eerste hier.”  Nou wonder ek net, hoekom dink almal hulle verdien  geluk.  Die waarheid is – ons verdien niks en tog is ons geregtig op alles. 

Dit maak mos nou nie sin nie… twee teenoorgestelde pole?  Albei kan egter jou realiteit wees.  Dit is so dat daar baie dinge is wat teen jou kan tel, maar daar is net soveel beloftes in die mees antieke geskrifte ter wêreld, naamlik Die Bybel, wat blatant verklaar dat ons alles kan kry wat ons soek.  So, alhoewel jy nie geluk verdien nie, is jy daarop geregtig omdat dit een van die waarhede in God se Woord is.

Jy kan vandag besluit wie jy is of wie jy wil wees.  Jy is die ontwerper van jou eie toekoms en… jou huidige situasie is die direkte oorsaak van besluite wat jy in die verlede geneem, of dalk nie geneem het nie.

Ek wil ‘n verhaaltjie met jou deel, maar kom ons kom eers ooreen.  Daar is net Een Lewende God (as jy twyfel, vertrou my… as jy Hom nog nie ken nie, kan ek jou aan Hom voorstel).  Ons almal het een of ander tyd die krag van gebed ervaar.

Nou vir die verhaaltjie.  Daar was ‘n jong seun wat vir ‘n fiets en ‘n lessenaar gebid het… vir maande aanmekaar.  Mismoedig het hy een aand in trane uitgebars en vir God gevra of Hy dan van hom vergeeet het, al bid hy so getrou.  God antwoord toe:  “Jy het nog nie regtig vir my gevra nie.  Jy’s te vaag.  Watter tipe fiets soek jy?  Kleur?  Hoevee ratte?  Fabrikaat?… en watter lessenaar soek jy?  Vir studies?  Hout, plastiek?   Wil jy ‘n stoel ook hê?”

Skielik het die seun verstaan en het hy begin kyk na verskillende tipe fietse en ook ‘n lessenaar gesien wat hy graag wou hê.  Die keer het hy vir God spesifieke voorskrifte gehad in sy gebed.

Binne ‘n maand het hy die presiese fiets gekry, sowel as die presiese lessenaar, een van Fillipynse Mahoniehout… net soos hy gevra het.

Waarvoor bid jy?  Is jy op soek na iemand om jou lewe mee te deel?  Wil jy hê dat jou besigheid moet groei?  Wees spesifiek.  Beskryf die tipe lewensmaat wat jy soek.  Wees spesifiek oor die tipe kliënte en hoe jy jou besigheid sien floreer.  Skryf dit neer en visualiseer dit.  Vra God nou en wag.

Jy sal vestom staan.  Sodra jy dit gedefinieer het en dit in so ‘n mate visualiseer dat jy glo dat jy daarop geregtig is, sal dit realiser.  Niks plaas so ‘n demper op jou planne as ‘n gebrek aan geloof of gevoude arms nie.  Maak jouself oop vir groot dinge.  “Vra en jy sal ontvang… soek en jy sal vind…”  Ons vra, maar ons soek nie altyd nie.  Om te soek is om tot aksie oor te gaan, en aksie lei tot oorwinning. 

Jou wildste drome kan so bewaarheid word.  Het jy genoeg geloof?  God is immers tot ENIGE IETS in staat… meer as wat ons ooit kan droom.

(Skrywer Onbekend)

Besoek gerus die webblad: www.watsediewoord.co.za