Nou

Psalm 118 : 24 – 25 Dit is die dag wat die Here gemaak het; laat ons daaroor juig en bly wees.  Red tog, Here, gee tog voorspoed, Here!

Hierdie is ‘n teks wat ons baie aanhaal, en dit is mooi en goed, maar ons kom selde tot by vers 25.  Dawid vra nie vir voorspoed vir more of volgende week of eendag nie, hy vra dit vir nou.  Hoeveel keer vra jy en hoop maar net vir die beste?  Partykeer vra jy so halfhartig en dink stilweg dat dit tog nie sal gebeur nie, maar laat ek maar vra.

Ek het ‘n tannie geken wat oral waar sy gekom het vir afslag gevra het, en baie keer het sy afslag gekry.  Meeste van ons sal dit nie waag om afslag te vra nie, dus kry ons di took nie.  Dis ‘n basiese beginsel… as jy nie vra nie, kan jy niks verwag nie.

Die tyd het aangebreek dat jy jou ‘jammer-dat-ek-lewe’ houding afskud.  Jy mag vra dat God NOU uitkoms gee.  As jy God NOU nodig het, vra dat hy op hierdie oomblik ingryp.  God het nie tyd nodig om dinge te laat gebeur nie.  Hy moet nie eers die nodige mense kontak of seker maak dat Hy geen wette oortree alvorens Hy beweeg nie.  Hy is ‘n God wat ‘in the moment’ is.